Тајванец казнет со 91.350 долари и затвор, неговиот миленик повредил доктор – судбината на папагалот е непозната

Тајванец е осуден на затворска казна од два месеци и парична казна од 3,04 милиони нови тајвански долари (91.350 американски долари) откако неговиот миленик папагал повредил лекар, објави Централната тајванска новинска агенција.

Докторот е идентификуван како Лин, кој како последица на пад предизвикан од папагалот го изместил колкот и ја скршил карлицата.

Настанот се случил на 13 јули 2020 година, кога бил „нападнат“ од папагал ара додека џогирал на пристапниот пат во округот Геирен, откако сопственикот на папагалот ја пуштил птицата да се вивне во небото без да преземе никакви мерки на претпазливост. Лин се исплашил од папагалот и паднал на земја, потоа птицата ненадејно долетала одзади и го изгребала на задниот дел од главата.

Лин го тужеше сопственикот на папагалот, чие презиме е Хуанг, за повреда од небрежност и бараше компензација за неговите финансиски загуби.

Иако Хуанг веднаш повикал брза помош за да го однесе Лин во болница, тој морал да помине една недела на лекување, а потоа морал да одмора дома повеќе од половина година и да добива нега.

Неговиот адвокат изјави дека Лин е пластичен хирург, а неговата работа вклучува „долго стоење за време на операциите“, така што неговата повреда доведе до големи финансиски загуби.

„Сега може да оди, но ако стои долго, се уште има вкочанетост“, вели адвокатот.

Претставник на локалниот окружен суд за медиумите изјави дека ова е „редок“ случај и не е евидентиран во судот за граѓански предмети во претходната деценија.

Судот пресуди дека падот на д-р Лин бил предизвикан од невнимание на Хуанг. Судијата рекол дека големината на папагалот од 40 сантиметри во висина и 60 сантиметри распон на крилјата значи дека Хуанг бил сопственик на големо животно и требало да преземе заштитни мерки.

Централната новинска агенција соопшти дека тој е осуден на затворска казна поради обвинение за ненамерна повреда.

Хуанг рече дека ја почитува одлуката на судот, но има намера да поднесе жалба, истакнувајќи дека папагалот не бил бил агресивен и дека обесштетувањето е превисоко. Судбината на папагалот е непозната.