Адвокатот што се бореше против апанажата тргна во нова битка – „ако им се мали платите на функционерите, нека одат во приватен сектор“

„Со одлуката на Уставниот суд на РМ со која се укинаа одредби од Законот за плата и други надоместоци на избрани и именувани лица во Република Македонија значително се зголеми основицата за пресметување на плата на функционерите. Зборувајќи од номотехнички и правен аспект мое мислење е дека одлуката на Уставен суд е исправна иако зачудува мотивацијата кај колегата адвокат за поднесување на оваа иницијатива, како и експедитивноста на Уставен суд да одлучи по иницијативата во во рок од 2-два месеци од поднесување на иницијативата. Би сакал да напоменам дека по иницијативата за укинување на апанажата на Уставен суд одлучуваше повеќе од 1-една година, вели Ќатоски.

Тој порачува дека на потег сега се парламентарните политички партии од опозицијата и власта кои треба да покажат солидарност со својот народ во време на криза.

„Поради тоа до парламентарните партии ќе поднесам иницијатива за измена на чл.11 од Законот за плата и други надоместоци на избрани и именувани лица во Република Македонија во која измена основицата за пресметка на платата на фукционерите ќе се утврди како минималната исплатена месечна плата по вработен во Републиката за претходната година, според податоците на Државниот завод за статистика“, вели младиот адвокат.

Тој смета дека ваквата измена на законот е економски оправдана имајќи предвид дека во изминатиот период нашата држава се соочуваше со корона криза, економска криза, а сега и криза предизвикана од воениот конфликт во Украина.

„Од друга страна сметам дека на овој начин ќе се изврши усогласување на платите на избраните и именуваните лица согласно станадардот на граѓаните во државата, па така избраните и именуваните лица ќе имаат примања кои што ќе бидат еднакви па и во голем дел повисоки од оние на просечниот работник во државата. Оваа измена е неопходна од причина што финансискиот надоместок на избраните и именуваните функционери во РМ не треба да биде основен стимул да се превземе со висока државна функција. Стимулацијата за вршење на високи државни функции треба да се гледа низ призмата на одговорноста на секој поединец да придонесе за општото добро и јавниот интерес како прашање на чест а не како прашање поврзано со привилегии“, вели Ќатоски.

На забелешката дека на овој начин се девалвира јавната функција, се намалува отпорноста кон корупција, а и дека многу квалитетни кадри  ќе бегаат подалеку од јавна функција адвокатот од Струга вели:

„Отпорност кон корупција се ствара со борба и казнување на корупцијата. Со предложената измена најниската плата на функционер ќе биде околу 45.000 денари, а доколку ги земеме и другите привилегии како исплата на дневници, патни трошоци (зло)употреба на службени возила и не е воопшто лошо. Со сегашниот закон најниската функционерска плата е повеќе од 65.000 денари па се поставува прашањето која ќе биде стимулацијата на младиот човек да работи било што освен јавна функција. Ќе биде баш онаа – сакам да станам директор кога ќе пораснам. За крај преземањето на јавна функција е доброволен и морален чин, па ако некому не му чини нека оди во приватен сектор“, вели Ќатоски.