Амбасадорката на САД Анџела Агелер, на својот Твитер профил објави дека тим за санкции од Вашингтон е пристигнат во земјава за поагресивно истражување на корумпирани функционери.
„Тимот за санкции од Вашингтон е тука за поагресивен поглед на минатите и сегашните корумпирани актери и да ги разгледа сите можни одговори. На правосудниот сектор во Северна Македонија му требаат повеќе истраги и гонење за да се покаже дека никој не е над законот“ се вели во објавата на Агелер на нејзиниот профил на социјалната мрежа Твитер.
Sanctions Team from Washington here to take a more aggressive look at past and current corrupt actors, and to consider all possible responses. North Macedonia’s justice sector needs more investigations, prosecutions to show that no one is above the law.
— Ambassador Angela Aggeler (@USAmbNMacedonia) December 6, 2022
Ова не е првпат во контекст на корупцијата амбасадорката на САД, Агелер, да изнесува остри ставови за состојбите во земјава. Пред неколку дена, на 2 декември, по повод одбележувањето на јубилејната 30-годишнина од партнерството на УСАИД со Македонија, во своето обраќање таа ја истакна важноста од намалување на корупцијата.
„Сега повеќе се фокусираме на вашето лидерство и инвестирање во три клучни области: подобрување на економската продуктивност, поттикнување на младите да преземат активна улога во иднината на земјата и намалување на корупцијата. Последново – намалувањето на корупцијата – е важно затоа што корупцијата во која било форма ја оневозможува оваа земја да напредува во економска, социјална, образовна и структурна смисла, за кои знаеме дека може и треба да продолжи да ги постигнува. Иако чекорите по патот кон ЕУ, корупцијата продолжува да го кочи напредокот на Северна Македонија преку забавување на економскиот раст и поттикнување на најталентираните млади луѓе од земјата да бараат можности во странство“, порача амбасадорката Агелер.
Од остри критики амбасадорката Агелер не се воздржа и при изборот на Ислам Абази за шеф Основното јавно обвинителство за гонење организиран криминал и корупција, чин што го оцени како збунувачки.
„Ние, во Амбасадата на САД, секако дека резултатите ги сметаме за збунувачки, особено откако во изминатите години потрошивме милиони долари на обука на обвинители и други во правосудниот систем“, одговори амбасадорката на САД, на прашање на „360 степени“.