Нека е аирлија! Пинтија за првпат доби спортска сала и ќе го носи името на загинатиот херој од 2001, Александар Стојчев, објави градоначалникот на Кисела Вода Орце Ѓорѓиевски, откако денеска беше отворен новиот спортски објект со површина од 350 квадратни метри.
„Денес правиме значаен чекор за Пинтија и за целата општина Кисела Вода. Со гордост ја пуштаме во употреба првата затворена спортска сала во оваа населба – простор кој ќе им овозможи на учениците од ПОУ „Рајко Жинзифов“ да имаат современи услови за физичко образование, спорт и рекреација. Овој проект е доказ за нашата посветеност на унапредување на спортската инфраструктура и создавање подобри можности за младите. Особено ми е чест што оваа сала го носи името на нашиот херој, Александар Стојчев, кој го даде својот живот за татковината во 2001 година. Неговата жртва никогаш нема да биде заборавена, а денешниот настан е и симбол на нашата почит кон неговото семејство, кое е денес тука со нас. Денес, со неговото семејство, заедно ја пуштивме во употреба“, вели градоначалникот Ѓорѓиевски.
