Премиерката Ана Брнабиќ денеска ја обвини опозицијата дека ги „политизирала“ двете неодамнешни масовни убиства во Србија со цел да ги нападне претседателот Александар Вучиќ и владата.
Откако опозицијата најави дека во понеделник ќе протестира поради ситуацијата во Србија, таа потсети дека слични масовни убиства имало и во други земји, но дека „никој никогаш не го искористил за политичка пресметка и напад на власта. “.
„Тоа е незамисливо. Скандалозно и човечки неразбирливо е што велите дека за овие злосторства се виновни Александар Вучиќ и Српската напредна странка. Дали се нормални, како е виновен. Избрзавте да политизирате и тоа не придонесува за намалување на поларизацијата кај нас“, изјави Брнабиќ за телевизијата Хепи.
Таа праша дали по масовните убиства во 2002 година во Лесковац и 2007 година во Јабуковац кај Неготин, тогашната опозиција повика на протести.
„Жал ми е што не сме сите обединети околу ова. Мора да најдеме начин да се здружиме како општество и да излеземе од ова. Сигурен сум дека ќе решиме многу проблеми и ќе излеземе посилни, но во моментов изгледа многу тешко бидејќи изгубивме деца и тоа на училиште. На некој начин тоа е пресвртница за секое општество“, рече Брнабиќ.
Таа оцени дека масовните убиства во белградското основно училиште „Владислав Рибникар“ и во Младеновац и неговата околина се „последица на времето во кое живееме“.
„На прво место, социјалните мрежи и атмосферата во која слободата на говор се злоупотребува до толкава мера и нашироко се забележува дека промовирањето насилство на социјалните мрежи стана норма и стандард со кој нашите деца треба да живеат, изјави премиерката на Србија.
Коментирајќи ја најавата за воведување нови мерки, таа рече дека најважно е „целосното разоружување“ на Србија.
„Мислам дека донесовме многу добри мерки. Воведувањето на дополнителни 1.200 полицајци само во училиштата е исклучително добра мерка, која секако ќе има влијание за значително намалување на врсничкото насилство. Во моментов имаме 373 училишни полицајци во 648 училишни објекти и сега замислете да имаме 1.200 повеќе и да одиме кај повеќе од 1.500 полицајци. Тоа се сериозни мерки“, рече премиерката.
Таа додаде дека како човек и како родител“ ги разбира барањата за враќање на смртната казна, но и дека има причини зошто таквата казна е укината во Србија.
„Мислам дека смртната казна не треба да се врати, но можам да разберам дека луѓето сакаат да ја видат сега“, рече Брнабиќ.
Брнабиќ оцени дека барањата за укинување на реалните шоуа во Србија, по двете масовни убиства во кои загинаа 17 лица, а над 20 беа повредени, се обид за „поедноставување“ на работите.
Таа изјави дека реалните шоуа „не се одлика“ на Србија и дека момчето што уби девет лица во белградското основно училиште „Владислав Рибникар“ „сигурно не гледало реални шоуа“.
„Како е можно некој на тој начин да ги поедноставува работите и да каже „тоа е решението“. Всушност, не ве интересира решението, ве интересира политичката борба“, рече премиерката во гостувањето на телевизија Хепи.
Таа додаде дека меѓу претставниците на опозицијата кои бараат укинување на реалното шоу е и политичарот кој ја донесе реалити ТВ во Србија и од неа се збогати.