Фармацевтската компанија „Kissei Pharmaceutical“ од Јапонија ги повика лекарите да не го користат лекот „Тавнеос“, откако во земјата биле пријавени 20 смртни случаи за кои постои сомнеж дека се поврзани со терапијата.
Компанијата соопшти дека околу 8.500 лица го користат „Тавнеос“ од неговото пуштање во употреба во Јапонија во јуни 2022 година, за лекување на микроскопски полиангиитис и грануломатоза со полиангиитис, пренесува „Ројтерс“.
Овој лек се користи за лекување ретки заболувања на бубрезите, а предупредувањето до здравствените работници следува откако Американската агенција за храна и лекови (FDA) во март предупреди на тешки оштетувања на црниот дроб кај пациенти кои користеле „Тавнеос“. Лекот првично бил развиен од компанијата „ChemoCentryx“, која е подружница на „Amgen“.
FDA на 27 април предложи повлекување на одобрението за лекот во Соединетите Американски Држави, наведувајќи дека добила информации оти „ChemoCentryx“ давала „невистинити изјави за материјални факти“.
Иако одобрението за „Тавнеос“ во Јапонија сè уште е во сила, компанијата „Kissei“ им препорача на лекарите внимателно да проценат дали терапијата треба да продолжи кај постојните пациенти.
Според податоците на компанијата, во Јапонија биле регистрирани 22 случаи на синдром на исчезнување на жолчните канали кај корисници на „Тавнеос“, од кои 13 завршиле со смртен исход.
