Ситуацијата во Перу и понатаму е комплицирана, и покрај покажаната желба и на демонстрантите и на привремените власти за мирно решавање на конфликтот.
Барањата на демонстрантите се фокусираа на предвремени избори што е можно поскоро и ослободување на претседателот Педро Кастиљо. Легално избраниот претседател беше уапсен 18 месеци, што доведе и до протести во земјата на крајот на минатата година.
Заедно со главните барања се слушаат и различни пораки како за поцврста рака во владеењето, целосна промена на политичкиот систем во земјата, за независна надворешна и внатрешна политика на државата Перу и ослободување од моделот на неолиберализмот.
Со блокирање на патишта во различни области, демонстрантите се обидуваат да ги натераат властите да ги слушнат нивните барања, но и да ги заземат аеродромите кои ги обезбедува полицијата и војската. Токму за време на овие обиди се случија најмногу убиства на луѓе, кои веќе надминаа 50. Овие жртви длабоко ги погодија Перуанците, кои важат мирољубиви луѓе и како такви сакаат да живеат во мирна и просперитетна земја.
Во главниот град Лима, покрај протестите, се одржа и бдеење во спомен на загинатите во градот Ајакучо и на други места. Сепак, како главен град, Лима не беше толку погодена од протестите, иако демонстрантите од целата земја се собраа овде во четвртокот. Имаше и судири со полицијата во кои едно лице загина, а други беа повредени. Вонредна состојба е прогласена во многу региони во земјата, вклучувајќи го и главниот град Лима.
Најпогодени од вонредната состојба се туристите, кои под притисок на околностите и динамичното опкружување се однесуваат панично. Многу туристи се упатија кон туристичките места северно од Лима, на северот на земјата, што е помирниот дел, бидејќи протестите првично го опфатија главно југот на земјата, областите околу Куско, Пуно и Ајакучо. Но, блокирани беа и патиштата во северниот дел на земјата, што повторно доведе до промена на плановите на туристите. Бидејќи земјата се потпира исклучиво на туризмот, се прават сите напори на туристите да им се обезбеди слободата што им е потребна. Но, тоа не е секогаш можно во сегашната комплицирана ситуација.