Српската напредна партија (СНС) прогласи победа на повторените локални избори во Белград и во десетици други градови низ земјата.
Опозицијата повторно обвини за нерегуларности.
Според излезните анкети, коалицијата предводена од СНС освои 52,9% гласови во Белград, додека на второто место заврши движењето „Тргни-промени“ на адвокатот Саво Манојловиќ со 17,2% гласови.
Во Белград повторно се гласаше откако по изборите на 17 декември опозицијата ја обвини власта за изборна кражба, а меѓународните набљудувачи заклучија дека имало нерегуларности, што доведе до политички тензии во земјата.
Прогласувајќи победа, претседателот Александар Вучиќ изјави дека неговата партија ќе има мнозинство во градското собрание, во кое седат 110 пратеници.
„Ова е неверојатна победа“, кажа Вучиќ.
Манојловиќ изјави дека неговата алијанса нема да ги признае резултатите од изборите.
„Ова беа најнерегуларните избори досега“, рече тој.