Стратешкото партнерство меѓу Србија и САД беше претставено како интерес на Белград, за што јавно зборуваше и министерот Ивица Дачиќ. Малку порано оваа можност ја спомена и амбасадорот на САД во Србија, Кристофер Хил, а се во сенка на подобрување на односите меѓу двете земји. Ваквата соработка го трасира патот кон „политичко разбирање“ на Вашингтон, кое одамна не е видено кон Белград, додека дел од српската јавноста изјавите на Дачиќ ги доживува како негово стратешко репозиционирање. Накратко, корист би имала и Србија, но и дел од српските функционерите би можеле да добијат и „појас за спасување“ поради близината со Москва, пишува во својата анализа српскиот портал Нова.
Министерот за надворешни работи на Србија, Ивица Дачиќ, во средата изјави дека Србија има силен интерес да ги подигне односите со САД на ниво на стратешко партнерство, чиј еден од клучните столбови би била економската соработка, како мотор за натамошно зајакнување на економските и севкупните врски меѓу двете земји.
Тој додаде дека оваа соработка се води од зголемениот прилив на инвестиции од американските компании, зголемената трговска размена на стоки и на услуги и традиционално значајната финансиска поддршка преку различни програми за развојна помош, чија вредност надминува една милијарда долари.
Сепак, клучната порака до српската јавнос беше стратешкото партнерство, бидејќи од Белград долго време немаше пораки дека сакаат ваков тип на соработка со Вашингтон. За волја на вистината, и САД долго време срамежливо го отвораа просторот за надминување на кризата и за санирање на нарушените односи меѓу двете страни, кои датираат од 90-тите години. Американскиот амбасадор Кристофер Хил уште во октомври зборуваше за можноста за стратешко партнерство меѓу двете страни, пишува нова Нова.
Американскиот амбасадор Хил беше сосема јасен – во иднина е можен договор за стратешко партнерство меѓу двете земји.
Тој рече дека Вашингтон сака да работи со Србија и дека косовското прашање треба да се реши во некоја форма. А оваа изјава на Хил, која беше дадена во интервју за Гласот на Америка, дополнително ја „отвори вратата“ за односите меѓу двете земји, што, судејќи според изјавите на високи функционери, може да доведе до високо ниво на соработка како стратешко партнерство.
Новинарот и надворешнополитички аналитичар Бошко Јакшиќ за Нова вели дека веќе извесно време доаѓаат сигнали дека односите меѓу двете земји треба да се постават на повисоко ниво.
„Идејата за стратешко партнерство првпат беше објавена од американскиот амбасадор Хил пред неколку недели. Очигледно е дека оваа идеја беше добро прифатена во Белград, а тоа е и сигнал дека Белград и Вашингтон сакаат да ја подигнат на повисоко ниво. Досега тие односи беа политички и дипломатски на ниско ниво“, изјави Јакшиќ за Нова.