Министерството за надворешни работи потврдило дека Љубомир Фрчкоски, македонскиот амбасадор во Њујорк во Организацијата на обединетите нации е повикан на консултации во Скопје, јави Телма.
Како што јавува телевизијата, Фрчкоски е повикан на консултации поради проверка на повеќе наводи за прекршување на правилата на работа и поради проверка на сомнежи за злоупотреба.
Според се уште не потврдени информации наводно Фрчкоски направил злоупотреба на службената картичка за авионски билети без почитување на пропишаните процедури во МНР како и поради тоа што амбасадорот во светската организација не ги почитувал и препораките од претходниот шеф на дипломатијата Бујар Османи.
Порталот МКД објави и дека Фрчкоски е повикан да се врати во Скопје и затоа што немало евиденција на парите од продажбата на имотот кој со сукцесија на поранешна Југославија е доделен на Македонија.
Станува збор за имот кој е на територија на САД.
Фрчкоски е трет амбасадор кој по промената на власта е повикан на консултации, по амбасадорите во Рим и Тирана.