Денеска попладне и во текот на ноќта ќе има повремени врнежи кои ќе бидат претежно од снег со слаб до умерен интензитет. До изутрина на планините снежната покривка ќе се зголеми, а ќе се формира помала снежна покривка и на некои пониски места, особено во северните делови, соопштуваат од Управата за хидрометеоролошки работи(УХМР).
Во Скопје во текот на ноќва ќе има повремени врнежи од снег и во делови од котлината ќе се формира мала снежна покривка.
Утре времето ќе биде со слаб локален снег, а преку денот сончево со мала до умерена облачност. Ќе дува слаб до умерен ветер од северозападен правец, кој долж Повардарието повремено ќе засилува.
За време на викендот времето ќе биде променливо облачно и студено, во сабота со повремени врнежи претежно од снег со слаб до умерен интензитет. Ќе дува засилен, повремено силен северен ветер (над 80 км/час).
Студеното време ќе се задржи и во текот на следната седмица, со минимални температури и под -10 степени, а на места и дневните ќе бидат под нула, најавуваат од УХМР.