Голема тага ја потресе семејството Нисе и локалната заедница во американската сојузна држава Охајо, откако двајца малолетни браќа трагично ги загубија животите во тешка сообраќајна несреќа.
Според информациите од Канцеларијата на шерифот на округот Хенри, несреќата се случила на крстосница кога 17-годишен возач на пикап не застанал на знак „стоп“ и удрил во теренско возило (SUV) во кое се превезувале децата со нивниот татко.
Деветгодишниот Гас починал на местото на несреќата, додека неговиот постар брат, десетгодишниот Арчер, бил итно пренесен со хеликоптер во болница. И покрај напорите на лекарите, тој подоцна им подлегнал на тешките повреди.
Нивниот татко Тајлер, кој работи како правосуден полицаец, бил хоспитализиран со повреди, додека 17-годишниот возач поминал со полесни повреди.
Од училишниот округ „Лајпсик“, каде што учеле момчињата, упатија емотивна порака до семејството, истакнувајќи дека Гас и Арчер ќе останат запаметени како деца кои секогаш се труделе сите околу нив да се чувствуваат прифатени и вклучени.
По трагедијата, заедницата организирала хуманитарна акција преку платформата GoFundMe, преку која за кратко време биле собрани повеќе од 127.000 долари за поддршка на семејството.
Тетката на загинатите момчиња, Витни Нисе, им се заблагодари на сите кои донирале, испратиле пораки за поддршка или биле со семејството во овие тешки моменти.
Во тек е истрага која треба да ги утврди сите околности под кои се случила несреќата.