Поранешниот градски советник и позната јавна личност од Задар, Милан Драча (51), почина од тешките повреди што ги здобил во физичка пресметка која се случила доцна синоќа во населбата Бокањац.
Според информациите од хрватските медиуми, инцидентот се случил во близина на локалните гробишта. Полицијата добила пријава за тепачка меѓу двајца мажи во 23:44 часот, а по пристигнувањето на местото на настанот го пронашла Драча како лежи тешко повреден.
На повредениот веднаш му била укажана итна медицинска помош, по што бил пренесен во Општата болница во Задар. И покрај напорите на лекарите, тој подоцна им подлегнал на повредите.
Во врска со случајот е уапсен маж кој се доведува во врска со инцидентот. Осомничениот бил приведен веднаш по пристигнувањето на полицијата, а истрагата продолжува во координација со надлежното обвинителство.
На местото на настанот бил пронајден и автомобил за кој се претпоставува дека го користел еден од учесниците во конфликтот. Истражителите работат на утврдување на сите околности што довеле до трагичниот исход.
Милан Драча беше добро познат во јавноста во Задар. Тој беше ветеран од Татковинската војна, поранешен член на ХДЗ и претставник на српското национално малцинство во Градскиот совет. Освен политичкиот ангажман, беше активен и како фотограф и општествен активист. Неговата смрт предизвика бројни реакции и сочувства во хрватската јавност.
