Босна и Херцеговина е завиена во црно по трагичната несреќа што се случи за време на искачувањето на Елбрус, највисокиот врв во Европа.
Во несреќата животот го загубија петмина членови на експедицијата од Зеница, меѓу кои и сопружниците Алма и Денис Окановиќ, познати љубители на планинарењето и природата.
Тие беа препознатливи по својата Фејсбук страница „Tri fantastiko“, каде редовно споделуваа фотографии и видеа од планинарските авантури. Посебно внимание привлекуваше нивната мачка Мацика, која често беше дел од нивните прошетки и планински патувања, освојувајќи ги симпатиите на илјадници следбеници.
Алма и Денис беа инспирација за многу љубители на планините, а нивната љубов кон природата и животните ги направи омилени во планинарската заедница.
Нивната последна објава на социјалните мрежи беше објавена само два дена пред трагедијата. Во неа со радост соопштија дека успешно ја завршиле аклиматизацијата на височина од 4.500 метри, подготвувајќи се за завршниот дел од искачувањето кон врвот Елбрус.
За жал, токму таа објава остана нивен последен поздрав до пријателите и следбениците.
Веста за нивната смрт предизвика голема тага во Босна и Херцеговина и низ целиот регион. Социјалните мрежи се преплавени со пораки на сочувство, а бројни пријатели, колеги планинари и граѓани се простуваат од Алма и Денис, потсетувајќи на нивната неизмерна љубов кон планините, природата и животот.
Трагедијата на Елбрус засекогаш ќе остане запаметена како една од најтешките несреќи што ја погоди босанската планинарска заедница.