Владината реконструкција која се очекува да биде финализирана во наредните денови отвора нови прашања за стабилноста на владејачката коалиција. Според информации од политички извори, во рамки на преговорите се разгледува можноста министерот за правда Игор Филков да биде разрешен, а ресорот да премине под контрола на ВМРО-ДПМНЕ.
Неофицијално, ваквото сценарио наидува на сериозен отпор во редовите на ЗНАМ. Извори од партијата брифираат дека евентуалната смена на Филков би можела да биде причина ЗНАМ да ја преиспита својата позиција во Владата, па дури и да ја напушти владејачката коалиција.
Според информациите што кружат во политичките кругови, како компензација за ресорот Правда, на ЗНАМ би можело да му биде понудено Министерството за земјоделство. Сепак, засега нема официјална потврда дека партијата е подготвена да прифати таква размена.
Во меѓувреме, разговорите за реконструкцијата продолжуваат. Според досегашните најави, се очекуваат промени во најмалку седум до осум министерства, што би значело една од најобемните реконструкции од формирањето на актуелната влада.
Клучен момент би можела да биде средбата меѓу лидерите Христијан Мицкоски и Максим Димитриевски, на која треба да се разгледаат отворените прашања поврзани со распределбата на ресорите и идниот состав на Владата.
Доколку се потврдат најавите за смена на Филков и доколку ЗНАМ остане на ставот дека тоа е неприфатливо, владината реконструкција би можела да прерасне во сериозен политички предизвик за владејачкото мнозинство.
