Европската унија повторно го одложи воведувањето на Европскиот систем за информации и овластување за патување (ETIAS), кој сега се очекува да стане оперативен во последниот квартал на 2026 година.
Овој систем ќе бара од граѓаните на земјите ослободени од визи, како што е Северна Македонија, да добијат одобрение пред да патуваат во Шенген зоната.
Покрај тоа, Системот за влез/излез (EES), кој ќе собира биометриски податоци при влез и излез од Шенген зоната, е планиран да започне со работа во октомври 2025 година. Овој систем има за цел да ја модернизира граничната контрола и да спречи идентитетски измами.
Кога ETIAS ќе стане задолжителен, патниците ќе треба да аплицираат онлајн, да платат такса од 7 евра, и да добијат одобрение кое ќе важи три години или до истекот на пасошот. Се препорачува патниците да аплицираат навреме пред патувањето, бидејќи процесирањето може да трае од неколку минути до 30 дена.
Овие одложувања значат дека патниците од Северна Македонија ќе можат да продолжат да патуваат во Шенген зоната без ETIAS до крајот на 2026 година. Сепак, се препорачува редовно следење на официјалните информации за да се биде информиран за евентуални промени во регулативите.
Почнувајќи од денот на примената на ЕТИАС системот околу 1,4 милијарди луѓе од 59 земји и територии ослободени од визи треба да имаат одобрение за патување за да влезат во 30 европски земји на краток престој до 90 дена во период од 6 месеци. Овие правила нема да важат за Ирска и Кипар, како и за Лихтенштајн, Норвешка, Исланд и Швајцарија. Регулативите ќе важат за патници и од Америка, Австралија, Велика Британија, Украина, Јапонија, Бразил, Аргентина, но и земјите од Западен Балкан, како Србија, Црна Гора, Босна и Херцеговина, Северна Македонија и Албанија.
ЕТИАС ќе важи три години, а во тој период ќе бидат дозволени неограничен број посети на овие земји. Ќе биде поврзана со пасошот на патникот, па кога ќе истече патниот документ, потребно е да се аплицира за нова дозвола.