Владата утре на седница ќе ја утврди листата на производи кои од среда ќе се продаваат по намалена, гарантирана цена, и тие не ќе смеат да поскапат до 30 ноември. Станува збор за 25 категории и над 50 производи од пекарската, месната, млечната и кондиторската индустрија кои во маркетите ќе се продаваат со ознака, а ќе чинат колку што се продавале на 1 август и дополнително на тоа намалени за минус 10 отсто, најави министерот за економија, Крешник Бектеши.
Листата на производите, како што нагласи министерот, е направена според анализите на Државниот завод за статистика за тоа што најмногу трошат граѓаните.
На оваа листа не се алкохолните и безалкохолните пијалоци, но Бектеши рече оти е уверен дека и тие ќе се продаваат со ознака „гарантирана цена“.
Министерот за економија најави и измени во делот на акциите кои можат да ги прават маркетите. Тој објасни дека ќе бидат дозволени акции на прозиводи заради уште пониски цени од гарантираната. Но, ако има акција заради истек на рокот на некој производ, тоа јасно мора да им биде нагласено на потрошувачите за да не бидат доведени во заблуда.