Трагична приказна доаѓа од Манчестер, Велика Британија, каде 24-годишна девојка починала во болница откако била оставена во ходник без приклучена маска за кислород. Медицинскиот персонал сметал дека „претерува“ и дека има напад на паника.
Клариса Стрит (24), дипломирана студентка на Универзитетот во Манчестер од Рочдејл, починала од белодробна емболија само неколку часа откако била примена во Кралската болница Олдам на 14 август 2024 година. Истрагата за нејзината смрт се одржа оваа недела.
Според информациите, Клариса била донесена со возило на Итната помош, а болничарите му кажале на персоналот дека „претерува“ и дека веројатно станува збор за напад на паника.
Медицинската сестра Мишел Нил побарала да се направат тестови, но ѝ ставила маска која не била поврзана со довод на кислород, па затоа била целосно бескорисна. На прашањето на судот зошто ѝ дала маска без кислород, таа одговорила: „Не знам“ и признала дека тоа било грешка.
Сепак, тврдела дека маската ѝ помогнала да го регулира дишењето, по што пациентката ја предала на постара медицинска сестра.
Во меѓувреме, Клариса била оставена во ходникот на Ургентниот центар речиси еден час. Планот бил подоцна повторно да биде прегледана и префрлена во Центарот за итна нега.
Но, пред тоа да се случи, нејзината состојба нагло се влошила, а младата девојка починала во раните утрински часови.
Судот утврдил дека причината за смртта била белодробна емболија и заболување на црниот дроб.
Клариса претходно преживеала белодробна емболија и длабока венска тромбоза во 2017 година, а во различни периоди користела лекови за разредување на крвта.
„Неверојатно е што не биле направени ниту основни прегледи само затоа што била млада и претпоставиле дека претерува“, се наведува во текстот.