Дваесет и двегодишна работничка во логистичка компанија останала без работа откако со месеци доаѓала на работното место и до 45 минути пред почетокот на смената. Иако тврдела дека тоа го правела од професионална одговорност и посветеност, судот пресудил во корист на работодавачот.
Според договорот за работа, нејзината смена започнувала во 7:30 часот, а била задолжена за контрола на транспортни налози и распоред на рути подготвени претходниот ден.
Сепак, компанијата навела дека пред почетокот на смената немало работни задачи што требало да се извршуваат. И покрај тоа, работничката редовно пристигнувала во кругот на компанијата меѓу 6:45 и 7:00 часот.
Работодавачот најпрво реагирал со усни предупредувања, а подоцна и со писмена опомена. Бидејќи не го променила своето однесување, добила вонреден отказ.
Пред судот, таа објаснила дека доаѓала порано поради големиот обем на работа и желбата навреме да ги заврши обврските.
Судиите, сепак, не го прифатиле тоа образложение. Во пресудата се наведува дека не била казнета затоа што била вредна или точна, туку затоа што не ги почитувала правилата на компанијата и упатствата на работодавачот.
Судот утврдил дека таа влегувала во работниот простор без да има доделени задачи и дека со тоа го нарушувала внатрешниот ред во компанијата. Дополнително, било нагласено дека упорно ги игнорирала писмените предупредувања.
Според судиите, станува збор за сериозно прекршување на работните обврски, засновано на непослушност, нелојалност и злоупотреба на довербата.
Во случајот биле споменати и проблеми поврзани со евиденцијата на работното време. Правните експерти сметаат дека предвременото евидентирање на пристигнување без реално извршување работни задачи може да се смета за злоупотреба на системот за работно време.
Случајот се случил во Шпанија, а правниците оценуваат дека слични последици би можеле да се случат и во други европски земји доколку работниците ги игнорираат јасните правила и инструкции на работодавачите.