Тригодишно момче се наоѓа во критична, но стабилна состојба, откако било фрлено во просторот со крокодили во зоолошката градина „Џонсонс“ во Олд Херст, Кембриџшир. Полицијата уапсила 30-годишен маж под сомнение за обид за убиство.
Инцидентот се случил во четвртокот околу 13:30 часот, по што детето итно било пренесено во болницата „Аденбрук“ во Кембриџ, каде лекарите му укажуваат интензивна медицинска помош.
Од полицијата во Кембриџшир соопштија дека истрагата е во тек и дека во моментот разговараат со сведоците кои се наоѓале во зоолошката градина за да ги утврдат точните околности.
Главниот детектив Верити Мекан изјави дека засега нема информации дека осомничениот маж и детето биле поврзани.
„Во оваа фаза од истрагата разговараме со лицата кои биле присутни во зоолошката градина за подобро да ги разбереме околностите на инцидентот. Не веруваме дека мажот и детето се поврзани. На семејството на детето му се обезбедува поддршка во болницата и нашите мисли се со нив“, изјави Мекан.
Случајот го коментираше и локалниот пратеник Бен Обесе-Џекти, кој ја повика јавноста да не шири шпекулации додека трае кривичната истрага.
Зоолошката градина „Џонсонс“ е семеен комплекс во кој се наоѓаат повеќе од 100 животни, меѓу кои африкански лавови, бенгалски тигри, крокодили и други егзотични видови.
Полицијата потврди дека состојбата на тригодишното момче останува критична, но стабилна, а специјално обучени службеници им пружаат поддршка на неговите најблиски.
Истрагата за овој шокантен инцидент продолжува.