Внимавајте, злоупотреба е рекламата за слабеење со Таравари – институциите веднаш да преземат мерки

Уште еден лекар е злоупотребен во лажна реклама. Овој пат д-р Арбен Таравари, лидерот на Алијанса на Албанците.

Тој на социјалните мрежи  предупредува дека неговото име е злоупотребено во реклама за производ за слабеење и ги повика институциите да преземат мерки.

„Како лекар, длабоко сум загрижен за ширењето лажна реклама во мое име за производ за слабеење, за којшто се тврди дека придонесува за губење на телесната тежина. Ги повикувам луѓето да бидат исклучително внимателни кога наидуваат на вакви содржини, коишто во дадени околности дури може да предизвикаат и големи штети по нивната здравствена состојба. Мој приоритет отсекогаш бил грижа за здравјето и благосостојбата на граѓаните. Сите граѓани треба да имаат пристап до точни и веродостојни информации кога станува збор за нивното здравје и благосостојба. Ги повикувам институциите да преземат мерки против ваквите лажни реклами коишто не само што можат да ги доведат потрошувачите во заблуда, туку и да предизвикаат сериозни здравствени ризици“, се вели во предупредувањето што Таравари го објави на Фејсбук.