По разшреувањето на директорот на Младинскиот културен центар(МКЦ), Ванчо Боегоев, и најавата на Град Скопје дека оваа институција ќе добие нов директор по „евалуацијата на биографиите за позицијата“, со официјално соопштение се огласија од Програмскиот колегиум на МКЦ, во кое се тврди дека Богоев е разрешен поради неподлегнување на притисоци да потпише вработување за Арбен Шаќири, познат во јавноста како Бени.
„Во попладневните часови вчера, постоечкиот в.д. директор на МКЦ, Ванчо Богоев кој е 36 години е дел од институцијата и кој со својот едвај целогодишен мандат продолжи во насока на растење и одржување на програмата на МКЦ, беше сменет од својата позиција поради неподлегнување на екстремните притисоци од Генералниот секретар на Град Скопје да потпише вработување за Арбен Шаќири“, се вели во соопштението.
Од таму посочуваат дека од утре МКЦ ќе добие нов директор, Никоал Алексов, чие име не беше споменато во официјалното соопштение од Град Скопје за именувањето на нови директори.
„Бидејќи, сега веќе екс директорот на МКЦ не ја потпиша таа одлука, од утре МКЦ има нов в.д. директор, Никола Алексов, дипломиран детектив, кој е примен пред два дена преку Агенција за привремени вработувања во МКЦ без никакво искуство и позадина во културна институција.
И покрај признанието кое дојде како круна на нашето работење со наградата “13 Ноември” за заслуги во областа на културата и масовната посетеност, можеби и најголема во историјата на институцијата по повод 50 годишниот јубилеј, годината почна со лоши вести за иднината на МКЦ. Првата е онаа дека буџетот ни е доведен до само 8% од годишниот буџет со кој работевме минатите години, а веднаш потоа и последните случувања во начинот на инсталирање на директор во МКЦ“, се вели во соопштението од МКЦ.
Од МКЦ изразуваат сомнеж за законитоста на целокупната постапка за избор на нов директор.
„Овој допис доаѓа како потреба за разјаснување на ситуацијата која се наметна, истовремено и поради сомнежот во законитоста на овие решенија бидејќи со ова, се одбегнува повотрно можноста да јавно се спроведе отворен конкурс за директор, на кој отворено и транспарентно би можеле да се пријават сите квалификувани професионалци од областа на културата“, се вели во соопштението.