(ФОТО) Во гаќите сокрил над еден килограм златен накит, запленет е на граничниот премин Богородица

Македонските цариници заплениле над еден килограм златен накит во вредност од 4 милиони денари при влез на патник на граничниот премин Богородица, со што воедно е спречен обид за избегнување плаќање увозни давачки во висина од еден милион денари.

Царинската управа информира дека златото е откриено при личен претрес на еден патник кој се обидел накитот да го скрие во внатрешниот дел на панталоните и долната облека коишто ги носел на себе.

Истото било спакувано во четири ќеси во коишто имало 60 ланчиња, 13 прстени, 128 обетки и 48 нараквици.

Златото ќе биде предадено во Народна банка, а против патникот ќе биде поднесена кривична пријава.