Голема полициска акција е во тек во германскиот град Ренинген, откако тримесечно бебе исчезнало откако било земено од детска количка. Полицијата трага по непознатото лице кое се сомничи за киднапирањето.
Според информациите од истрагата, бебето накратко останало без надзор, по што непознато лице го земало од количката и се оддалечило во непознат правец.
Полицијата била известена за исчезнувањето доцна во средата навечер, а од 23:30 часот започнала интензивна потрага по детето и можниот сторител.
Во акцијата се вклучени голем број полициски службеници, спасувачки екипи со кучиња трагачи, Црвениот крст, пожарникари, како и полициски хеликоптер и дронови кои го пребаруваат поширокото подрачје.
Засега нема конкретни траги за тоа каде се наоѓа бебето, а истражителите детално го пребаруваат теренот и ги проверуваат сите можни информации.
Локалните власти упатија апел до граѓаните да пријават секоја информација што би можела да помогне во пронаоѓањето на тримесечното момче и расветлувањето на случајот.
