Претседателката на Државната комисија за спречување корупција, Билјана Ивановска на социјалните мрежи реагираше на изјавата на вицепремиерот Артан Груби, кој вчера во гостување на Сител ТВ изјави дека немал доверба во овој состав на Антикорупциска, а денеска се огласи со реакција и Антикорупциската комисија.
„Тие досега немале ни еден успех“, изјави Груби.
Ивановска пак, преку социјалната мрежа Фејсбук, му порача: „Кога се е поинаку, дното е на површина“.
„Во право сте г. Груби, Антикорупциска нема капацитет да се вози во службени возила 24/7 и за приватни цели, да злоупотребува државни простории, да користи репрезентација и службени платежни картички, ниту да се расфрла со буџетски пари, но бидете уверени дека има капацитет да ги исполни своите законски обврски и надлежности и да изработи бројни иницијативи и препораки кои сеуште чекаат ред и време за да се постапи по нив“, се вели во реакцијата на антикорупционерите.
Груби вчера изјави дека мнозинство од случаите се изгубени во административни постапки, се отфрлени од страна на судиите и додаде дека се надева дека следниот состав ќе биде навистина сериозен.
Во продолжение реакцијата на Антикорупциската комисија:
„Да Ве потсетиме дека четири години по ред во Извештајот на ЕК за напредокот на земјата, добиваме позитивни оценки за својата проактивност и отворање случаи против високи функционери, што е директна потврда за оправданоста на нашето работење и за ажурноста на Комисијата токму во овој состав. Исто така, во своите извештаи ЕК ги повикува надлежните институции да постапуваат по препораките на ДКСК.
Преку своето работење, независност и непристрасност, Комисијата вложува сериозни напори да се задржи и зајакне интегритетот на институцијата, а со своето залагање за правилно разбирање на принципите и доследно владеење на правото, направи сериозен исчекор во сегментот во кој работи.
Зачудува фактот што оваа оценка на ЕК како највисоко тело на ЕУ Вие не ја признавате и изнесувате неосновани обвинувања, а истовремено се залагате за брз влез во ЕУ.
ДКСК е независна институција, со надлежност да постапува по предмети за избрани и именувани функционери. Квалификациите за капацитетите на Комисијата од страна на висок функционер од Владата на РСМ за кој има отворено предмет, не е ништо друго туку вршење притисок врз работата на Комисијата, и оркестриран обид за дефокусирање на јавноста. Ова дотолку повеќе што неодамна Кабинетот на вице премиерката за добро владеење ја обвини Комисијата за паушални и неосновани обвинувања поврзани со предметот за струшкиот градоначалник Рамиз Мерко иако на прес конференцијата на ДКСК такво нешто не беше споменато, а вице премиерот за евроинтеграции на билатералниот скрининг за образование култура и спорт побара од претседателката да не ја известува ЕК за поднесената тужба за клевета од страна на директорот за млади и спорт, Наумче Мојсовски.
ДКСК има капацитет да се избори со вашите оркестрирани напади“, стои во соопштението.