Четириесет и четиригодишна жена од американската сојузна држава Пенсилванија признала вина за убиството на својот партнер, кој починал по брутален напад што се случил во нивниот дом.
Винди Томас од градот Ири се изјаснила за виновна за убиство од трет степен, а изрекувањето на пресудата е закажано за 21 декември. Според обвинителството, ѝ се заканува затворска казна од 18 до 36 години.
Истрагата утврдила дека на 18 март минатата година, за време на расправија, Томас најпрво го повредила својот 44-годишен партнер Кин Батлер со нож, а потоа повеќепати го удирала со ногарка од маса.
Според истражителите, мажот подоцна починал како последица на тешките повреди и силниот притисок што настанал кога жената се фрлила врз него со целата своја тежина. Томас имала околу 136 килограми, додека Батлер тежел приближно 54 килограми.
Обдукцијата покажала дека смртта настапила поради респираторна слабост предизвикана од повредите на вратот и градниот кош, како и дополнителни повреди на главата здобиени за време на нападот.
Телото на Батлер било пронајдено во дневната соба од семејната куќа, откако Томас ги повикала итните служби.
Неговата сестра Сандра Батлер изјавила дека семејството очекувало построга казна за обвинетата.
„Сметам дека треба да добие најмалку 40 години затвор. Заслужува доживотна казна“, изјавила таа за локалните медиуми.
Томас ќе остане во притвор во затворот во Ири до изрекувањето на пресудата, додека семејството на жртвата се обидува да се справи со големата загуба.
„Нашата мајка сè уште го повикува секоја вечер“, изјавила сестрата на починатиот, опишувајќи ја болката што неговата смрт ја оставила кај најблиските.