Американскиот претседател Доналд Трамп возврати на обвинувањата на Хилари Клинтон дека неговата администрација го прикрива објавувањето на документи за Џефри Епстин, велејќи дека таа страда од „Трамповиот синдром на растројство“.
Поранешната државна секретарка на САД вчера ја обвини администрацијата на Трамп за „намерно забавување“ на објавувањето на досиејата поврзани со осудениот сексуален престапник и го повика својот тим да ги „објави документите“, објави Скај њуз.
Поранешната државна секретарка, исто така, рече дека „секој што е повикан на суд треба да сведочи“ пред Конгресот, инсистирајќи дека сослушувањата мора да бидат јавни и фер.
Таа, исто така, тврдеше дека таа и нејзиниот сопруг, поранешниот претседател Бил Клинтон, станале политичка цел.
„Немам што да кријам, ослободен сум од обвинение и немам никаква врска со Џефри Епстин“, рече Трамп денеска кога новинарите го прашаа за обвинувањата на Хилари Клинтон.
„Тие се вовлечени во тоа и тоа е нивен проблем. Ќе видиме што ќе се случи. Таа сериозно страда од Трамповиот синдром на растројство“, додаде тој.
Министерството за правда на САД досега објави повеќе од три милиони страници документи поврзани со Епстин. Сепак, начинот на кој беа објавени досиејата беше пречекан со остри критики од демократите, како и од некои републикански политичари.