Бугарскиот актер Христо Живков, најпознат по улогата на Свети Јован во блокбастерот „Страдањата на Исус“, по долго и тешко боледување почина на 48-годишна возраст.
Живков почина во Лос Анџелес по долга борба со ракот, објави Дедлајн.
Актерот и продуцент Христо Живков е роден на 18 февруари во главниот град на Бугарија, Софија. Дипломирал на Бугарската академија за филм и театар во главниот град, насока режија.
Набргу по дипломирањето ја добива главната улога во италијанскиот филм „Професија: Оружје“ на Ерман Олми. Во филмот го играше Џовани Медичи, а филмот во 2001 година беше номиниран за Златна палма во Кан, а освои дури девет награди Давид ди Донатело во Италија.
Успехот на овој филм ја отвори вратата за моќни улоги во други италијански филмови и телевизиски продукции, како и во Холивуд.
Следната значајна улога, по која ќе остане запаметен, е онаа на Свети Јован во блокбастерот на Мел Гибсон „Страдањата на Исус“, заедно со Џим Кавизел и Моника Белучи.
Овој филм од 2004 година беше номиниран за три Оскари и беше пофален од критичарите, но предизвика и бројни контроверзи ширум светот.
Со заработка од над 622 милиони долари, стана комерцијално најуспешниот филм за христијанството, но и еден од насловите со најголема заработка во историјата на бокс офисот.
Минатата година беше најавено дека ќе го има долгоочекуваното продолжение со наслов „Страдањата на Христос: Воскресението“, во кое требаше да игра и Живков, но целиот проект беше одложен за 2024 година.